Die Kurzsichtiga

von Ernst Schenke

Ar und Sie Sunntichs früh
ginga ei die Kerche,
Sie fängt oan: "Sieh ock Moan,
durte sitzt 'n Lerche!"
"Woas?" spricht Ar, "wu ock har,
's ies a klenner Hoase.
Siste nich, wie doas Viehch
Mannla macht eim Groase?"
Sie bleit stiehn, sie glutzt hien,
glutzt mit schorfa Blicka.
"Jekersch nee - 's ies a Reh,
ma erkennts om Rücka!"
Ar doodruuf rägt sich uuf:
"Weib, du bist ju tulle.
Loof ock, loof, 's ies a Schoof,
siste nich die Wulle?"
Aber flink kommt doas Ding
nähnder einm Galuppe.
"Nich gemahrt - 's ies a Fahrd
ma erkennt's om Kuppe.
Weich ock aus hinger'sch Haus,
is erschlät ins suster."
Jitz kimmts oan - "jekersch Moan,
's ies derr Krausa-Schuster!"